Маълумоти умумӣ

Вилояти Суғд имрӯз як минтақаи босуръат рушдёбандаи Тоҷикистон мебошад, ки дар он беш аз 2,7 миллион нафар зиндагӣ мекунад. Вилоят дорои рушди мунтазами иқтисодиёт, истеҳсолоти саноатӣ ва кишоварзӣ, роҳҳои нақлиёт ва хизматрасонии муосири сайёҳӣ мебошад.

Вилояти Суғд – вилояти маъмурӣ дар таркиби Ҷумҳурии Тоҷикистон бо таърихи қадима ва мавқеъи ҷуғрофӣ мебошад. Аз лиҳози ҷойгиршавии мусоиди худ вилояти Суғд ҳамчун дарвозаи тиҷоратии шимолии Тоҷикистон ва дурдонаи водии Фарғона машҳур аст. Аз ҳудуди вилояти Суғд ҳамаи системаҳои ҳаётбахшандаи водии Фарғона мегузарад. Инҳо роҳҳои оҳан, шабакаи газии байниҷумҳуриявӣ, хатҳои баландшиддати барқӣ ва роҳҳои автомобилгарди аҳамияти байналмилалидошта мебошанд.

Масоҳати вилоят 25,400 км² мебошад. Дар вилояти Суғд 8 шаҳр, 14 ноҳия вуҷуд дорад. Маркази маъмурӣ шаҳри Хуҷанд мебошад.